ZAMBOANGA CITY—Dies-y-sais paquete de shabu ya puede confisca el maga pulis desde con un drug pusher durante el buy-bust operation ya conduci na Familia Sagrada, Camino Nuevo anoche.
El mencionao operacion ya conduci el maga pulis del Central Police Station-Station Drug Enforcement Team ya encabesa el hefe del Investigation Unit si Chief Insp. Elmer Solon banda alas 10:55 del noche.
El maga pulis ya aresta con Eutiquio Tanglao y Magbanua alias Tata, 35 año de Camino Nuevo D.
Con Tanglao ya aresta el maga pulis despues este ya bende shabu balor P300 con el police undercover.
Durante el aresto di Tanglao, el maga pulis ya puede recobri desde na su posecion un bag que ta contene quinse otro paquete de shabu, el P300 marked money y cuantos drug paraphernalia.
Con Tanglao dayun ya lleva na estacion del pulicia mientras el maga paquete de shabu ya entrega na PNP Crime Laboratory.
Canda Solon ta prepara ya el propio caso que ay planta con Tanglao na corte. – Dan Toribio
