Radyoman Nick ginpasalamatan sang duha ka mga dalaga nga iya ginbuligan kontra sa lalaki nga nagasunod sunod sa ila

BACOLOD CITY – Nagpahayag sang iya daku nga pasalamat ang isa ka babayi kay Radyoman Nick MariƱo bangud sa pagbulig sa ila nga makalikaw sa posible katalagman nga himuon sang isa ka lalaki nga indi nila kilala kag nagsunod-sunod sa ila bisan diin ini magkadto.

Pinaagi sa iya FB account, ginpost ni Katrina Regalado ang iya daku nga pasalamat kay Radyoman Nick nga ginsalbar sila sang iya upod nga si Blessie Sumagaysay kahapon batuk sa isa ka lalaki.

Suno kay Regalado nga may mg alas 5:15 kahapon sang hapon, ini sila ang yara sa San Sebastian Cathedral kag nagsimba, apang sang manugtapos na ang misa, may isa ka lalaki nga nagpungko nga gin-describe sang babayi nga ā€œweirdā€ kon tulukon.


Natalupangdan ni Regalado nga wala naga focus sa misa ang amo nga lalaki kag ginkulbaan sila sang ini ang nagtupad na gid sa iya.

Pahayag ni Regalado nga mas pa gid sila nagduda sang ini ang nag-upod man sa ila sang pag-communion na.

Bangud sini, nag-decide sanday Regalado nga matapos ang pangalawat indi na magbalik sa ila una nga ginpungkuan kag nagsaylo na lamang, apang daku ang ila kakibot nga ang amo nga lalaki ang nagpungko sa likod nila nga pulungkuan.

Nagpangayo sang bulig sa ila katupad sanday Regalado kag ginlaygayan sila nga magtupad sang sa madamo nga tawo.

Wala sila gilayon nakahalin sa simbahan bangud nag todo ang ulan, apang sa gihapon wala nagapalayo sa ila ang lalaki kag padayon ang pagsunod sunod.

Nagdesisyon sila suno kay Regalado nga magsakay na lamang sa jeep bisan indi pa indi rota sang ila kaladtuan, apang sa gihapon nagsakay man ang amo nga lalaki.

Sa amo nga salakyan, yara man si Radyoman Nick Marino nga amo ang nakatupad sang duha kag ginpangayuan sang bulig.

Gin-upod sila ni Radyoman Nick MariƱo panaug sa area sang UNO-R apang sa gihapon nag-upod pa gid panaug ang lalaki kag naghana man sakay sa nagahulat nga salakyan ni Radyoman Nick.

Didto na kag ini ang gin-sita ni Radyoman Nick ang lalaki nga gilayon man nagpalayo, samtang, ini sila ang gindul-ong ni Radyoman Nick sa ila kaladtuan.

Halos indi ma explain ni Regalado kag sang iya upod nga si Blessie ang ila pasalamat kay Radyoman Nick sa ginhimo sini nga pagsalbar sa ila./dyHB BACOLOD

Facebook Comments