General Santos City—Patay ang usa ka rape suspek human nga nangilog ug pusil sa usa ka Police nga sakop sa Police Station 6, kagahapong adlawa. Giila ang suspek nga si Merston Mocodompis, 40-anyos, residente sa Zone 8, Brgy. Bula, ning syudad sa GenSan.
Subay sa blotter report sa Bula PNP, alas 5:00 ang takna kagahapon sa hapon dihang midangop sa ilang buhatan ang amahan sa 6 anyos nga bata aron isumbong ang pag among-among ug pag molestya niini ngadto sa 6 anyos nga batang babaye.
Subay sa sumbong sa amahan, alas 3:00 sa hapon matud pa giamong-amongan sa suspek ang bata didto mismo sa ilang lugar. Gani sumbong pa sa amahan nga upat ka higayon nang giamong-amongan sa suspek ang biktima subay na usab sa sumbong sa bata.
Gikaingong sukad pa bulan sa Enero gisugdan sa suspek ang pagpanghilabot sa menor de edad. Gilayong girespondihan sa kapulisan ang lugar diin malampusong nadakpan ang suspek apan samtang anaa sulod sa investigation section sa Women’s and Children Protections desk kalit niining giilog ang pusil sa usa ka babayeng police dayon gipamusil ang mga police apan swerte nga walay naigo.
Tungod niini napugos ang mga Police nga kini pusilon. Daling gidala sa ospital ang suspek apan gideklara kining dead on arrival.
