Davao City- Gilusad sa Davao City Fire District ang Oplan Ligtas Pamayanan aron malikayan ang sunog nga sagad mahitabo sa mga residential areas.
Sa interbyu sa RMN Davao kang Davao City Fire District head Fire Supt. Alex Pamaybay, giadlaw-adlaw nila ang recorida sa fire trucks sa matag lugar sa padayong pagpahimangno kalabot sa fire safety.
Gigamit usab sa kabomberohan ang social media aron ipakaylap ang tips kontra sunog pinaagi sa mga infographics ug video campaign.
“Ang among panawagan kay ang tema karon sa atong Fire Prevention Month kay ‘Sa Pag-iwas sa sunog hindi ka nag-iisa’, atong bantayan nga dili lang trabaho sa mga bombero ang prevent ug pag- suppress sa kalayo kundili individual concern nato ni atong bantayan nga dili ta masunugan sa atong mga panimalay, magtinabangay ta,” matud ni Pamaybay.
Nakatala og 50 na ka sunog ang dakbayan, upat niini ang significant tungod sa walo na ka mga namatay.
Kasagarang hinungdan sa mga sunog mao ang overloading, short circuit ug overheating.
Giawhag ni Pamaybay ang mga tagbalay nga ipasuta usab sa certified electricians ang mga linya sa kuryente ug kung adunay ma-detect o problema nga makita sa ilahang mga balay, itawag kini sa 911.
RadyoMaN Aimee Guinita
