Davao City – Maayong leksyon dili lamang sa mga call centers dinhi sa syudad apan alang sa tanang katawhan mismo ang ‘failed’ nga marka kun bagsak nga grado nato atol sa latest fire evacuation drills diha sa aspeto sa preparasyon ug kahibalo panahon sa emerhensiya sama pananglit sa sunog.
Sumala ni Rodrigo Bustillo sa Davao City Disaster Risk Reduction Management Office (CDRRMO), usa kini ka realisasyon nga gikinahanglang seryosohon ang ilusad nga mga ‘calamity drills’ sanglit kini maoy makaluwas kanato panahon nga mahitabo ang mga dili matagna nga kalamidad.
“Ang ato man gung ubang kaigsuonan, they just take it lightly nga murag compliance lang, where in fact ang mga drills atong gi-design nga maoy atong himuon panahon nga adunay ‘di matagna nga panghitabo,” tataw ni Bustillo.
Dugang sa maong opisyal nga sagad sa mga indibidwal mawala sa focus panahon sa paglampornas sa mga kalamidad gani pahimangno niini nga gikinahanglan ang konkreto nga kaalam sa kun unsay angay natong buhaton pag-igo sa mga disasters sanglit ang igong kahibalo ug preparasyon maoy maghatag kanato ug lig-ong kumpyansa nga maluwas kita gikan sa klase-klaseng katalagman.
RadyoMaN Jason Amisola
