Nagpatigayon sang regular reshuffling ang Bacolod City Police Office (BCPO) sa pagpamuno ni City Director Police Colonel Manuel Placido, epektibo kahapon, Enero 25.
Suno kay Police Lt. Col. Ariel Pico, spokesperson sang BCPO, si Police Major Jovil Sedel nga hepe sang Police Station 1 ang gin-reassign sa City Investigation and Detective Management Unit (CIDMU).
Si Police Major Ramel Sarona, hepe sang Police Station 6 ang magatal-os sa pwesto ni Sedel bilang hepe sang PS1.
Ang pwesto naman nga igabilin ni Sarona ang pagabuslan ni Police Captain Leo Estopa, hepe sang Police Station 2 samtang ang posisyon ni Estopa ang buslan sang iya deputy commander nga si Police Lt. Joven Mogato.
Iga-reassign naman ang hepe sang Police Station 4 nga si Police Major Charles Gever sa City Plans and Police Unit (CPPU). Ang pwesto nga igabilin ni Gever ang tal-usan ni Police Major Jun Ray Batadlan, hepe sang Police Staiton 8 samtang ang pwesto ni Batadlan ang buslan naman sang iya nga deputy commander.
Dugang pa ni Pico, si Police Captain Armilyn Vargas sang City Community Affairs Development Unit (CCADU) ang igabutang sa Police Station 10 nga maga-take over sa pwesto ni Police Major Ruel Culanag.
Si Culanag ang mangin bag-o nga head sang Bacolod Traffic Authority Office (BTAO) baylo kay Police Lt. Col. Luisito Acebuche. Si Acebuche ang igabutang naman bilang tagpamuno sang Administration Office sang BCPO.
Igabutang naman sa City Operations Management Unit si Police Lt. Col. Lester Leada sang CPPU.
Samtang si Police Major Sherlock Gabana sang CCADU ang na-reassign bilang officer-in-charge sang CCADU kag Human Rights Affairs Office (HRAO).
Si Police Lt. Christine Cerbo sang IDMU ang iga-designar bilang assistant chief sang CIDMU.
Ginpatuman ang nasambit nga reshuffling bangud pila ka mga police officers ang na-promote kag kinahanglan nga ma-occupy ang pila ka mga pwesto sa BCPO.
[image: image.png]
