South Cotabato—Sikop ang usa ka retired PNP Member ug kaubanan niining mag-uuma human nga makuhaan ug armas sa operatiba sa Tboli PNP sa ilang gihimong operasyon kagabie sa Barangay Datal Bob, Tboli, South Cotabato.
Ang dinakpan giilang si SPO4 Teodorico Babao Bastan Jr., 65, minyo, Retired PNP member nga kanhing nadestino sa Traffic Management Unit sa Gensan City Police Office ug residente sa maong lugar. Nakuha sa posisyon sa retiradong Pulis ang (1) ka unit sa Ingram MC11 Caliber 9mm, (1) ka magazine ug (5) ka mga bala.
Sa impormasyon gikan sa Tboli PNP nasayran nga adunay standing warrant of arrest ang retiradong pulis sa kasong kalapasan sa R.A. 9262 nga may criminal case number 80150-2025 ug 80751-2015 kansa una nang gipagula ni Hon Judge Lope Calio sa 11th Judicial Region sa RTC Branch 33, Davao City.
Samtang giila usab ang kaubanan niini nga si Jony Bacaling Celiz, 36, minyo, mag-uuma ug residente sa Barangay Simbo, Tupi, South Cotabato. Nakuha gikan sa iyang posisyon ang (1) ka unit sa 38 pistol, (1) ka magazine nga dunay upat ka mga bala.
Nasayran nga nisuway pag sukol ang mga nahisgutan apan sila nakorner sa kapulisan maong wala makapalag. Kasong kalapasan sa R.A. 10591 o iligal nga paghupot ug armas ang gikatakdang ipasang-at nga kaso batok sa mga suspetsado.
Photo Credit to: Tboli MPS
