Retired Police gintiro sang riding in tandem sa merkado publiko sang Koronadal

17

Lima ka basiyo sang cal 45 pistol kag isa ka balinis ang narekober sa panibag-o nga insidente sang pagpangluthang alas 11:20 kaina sang aga sa Zulueta Street, Barangay Zone 1, particular sa gate number 4 sang Koronadal City Public Market. Ginkilala ni Police Lt. Sotelo, Spokesperson sang Koronadal City PNP ang biktima kay Police Master Sergeant (SPO1) Armando “Itom Domingo” (retired) residente sang Purok Leganes, Barangay Zone 1, Koronadal City. Dugang pa ni Lt. Sotelo, duha ang suspek nga nakasakay sa wala natumod nga klase sang motor ang nagtiro sa biktima. Sa subong ginakabig nga work related ang motibo sa insidente, apang suno kay Lt. Domingo padalman pa ang imbestigasyon kun ano pa ang madalom nga rason sa pagtiro sa anay police opisyal. Dati nga miyembro sang Koronadal City PNP ang biktima apang nasaylo sa South Cotabato Provincial Headquarters bag-o nagritiro. Sa pihak nga bahin ginpahayag sang mga nakakita sa krimen sa merkado nga nakasakay ang biktima sa pampasahero nga tricycle para magbakal sang iya kinahanglanon sa sulod sang merkado, pero hinali na lang ini nga gintiro sang isa sa mga suspek sang pipila ka beses. Matapos ang krimen, gilayon nga nagpalagyo ang mga suspek sakay sa motorsiklo. Gindala naman sa pinakamalapit nga ospital ang biktima para isalbar pa ang iya sini kabuhi.

Facebook Comments