Reward system vs COVID-19 dili angay saligan

Davao City – Hangtod padayon nga magmagahi ang tawo sa pagtuman sa health protocols nga gitakda sa gobyerno, dili gihapon makatabang ang reward system aron makab-ot ang zero new cases sa COVID-19 sulod sa duha ka bulan sama sa pamaagi karon ni Manila Mayor Isko Moreno nga P100, 000 nga reward alang sa barangay nga makatala og walay bag-ong kaso sa pandemic virus gikan September kutob October ning tuiga.

Sumala ni Barangay Maa Kapitan June Cañete, wala sa reward system ang problema apan anaa sa kagahi og ulo sa mga tawo diha sa pagsunod sa mga palisiya sa health protocols.

Segun ni Kapitan Cañete nga sa pamaagi ni Mayor Isko, mugawas nga daw walay gibuhat ang barangay opisyales aron batukan ang dugang pagkanat sa kagaw bisan paman og dili lilong nga ang hinungdan sa padayon nga pagtakod-takod sa sakit mao ang pagkasupakiro ug ka-walay kooperasyon sa publiko sa paningkamot sa mga barangay opisyales diha sa mga pasidaan sa health protocols.


Ang padayon nga pagsalikway sa katawhan sa pasidaan mismo ni Pangulong Rodrigo Duterte ug sa mga Local Chief Executive nga dili magpahigayon og party kon panagtapok nagpakita lang sa kagahi og ulo sa mga Pilipino.

Dugang sa Kapitan nga sa karon ilawom na sa mas luag nga karantina ug wala na’y curfew hour ang mga lugar sa Pilipinas, maglisod ang mga barangay opisyales sa pagbadlong sa ilang katawhan nga kung mahimo dili manggawas sa ilang mga balay sanglit gikinahanglan nila manarbaho aron makalatas sa krisis nga nasinati karon.

Aminado si Kapitan Cañete nga makadasig kanila sa ang reward system apan ma-anaa ma’y reward o wala maningkamot gayod silang mga barangay opisyales sa pagpakusog sa kampanya kontra COVID-19 diin panawagan niini sa publiko mao nga paminawon ang panawagan sa gobyerno nga sundon ang health protocol policy aron dili maapil sa listahan sa mga mipanaw tungod sa maong balatian.

“Malabo na (Reward System) kay dinhi lang sa among barangay, Sa Maa dili gyod na mahitabo (Zero new cases sa COVID-19). Naningkamot ang atong Presidente nga walay mabiktima pero unsaon man lagi ning atong batasan nga arang kagahi nga imbes bawal like party, naa gihapon mag-party,” segun ni Kapitan Cañete.

RadyoMaN Joel Viray

Facebook Comments