RIDING IN TANDEM STRIKES AGAIN| Mercedes Nava kag kaupod sa salakyan, patay matapos ginluthang sang riding-in-tandem

4210

Patay sanday Mercedes ‘Ging-ging’ Nava kag kaupod sini nga si Erwin Fontillas, 42 anyos sang Brgy. Airport, Mandurriao matapos ginluthang sang riding-in-tandem samtang sakay sa Mitsubishi Strada sa Brgy. Calajunan, Mandurriao pasado alas 11:00 kaina sang udto , Enero 4,2019.

Suno kay Chief Insp. Marlon Valencia sang Mandurriao PNP, naka-angkon sang patal nga kapilasan si Nava sa baba kag dughan nga gindeklarar nga patay sang doktor sa Western Visayas Medical Center .

Suno naman kay Reynan Fontillas, utod ni Erwin Fontillas, naka-angkon sang kapin anum ka patal nga pilas sa dughan kag tiyan si Erwin nga isa ka katapo sang LGBT community nga gintuna-an man sang iya kamatayon.

Wala naman gintandog sang mga suspek ang duha ka menor de edad nga kaupod nanday Nava kag Fontillas.

Anum ka empty shell sang .45 caliber pistol ang narecover sang kapulisan sa crime scene.

Utang ang ginasundan sang Mandurriao PNP nga motibo sa krimen.

Si Mercedes ‘Ging-ging’ Nava ang pakaisa ni City Councilor Plaridel Nava.

Madumduman nga sang Disyembre 12,2018, ulihi nga na-interview sang RMN Iloilo si Mercedes Nava kon sa diin iya ginbuyagyag nga peke ang iban nga pirma nga gingamit sang grupo nanday City Councilor Plaridel Nava, Joshua Alim kag Ms. Jane Javellana sa reklamo batok sa Panay Electric Company ukon PECO .

Facebook Comments