RMN @ 68: Pagpangalagad magpadayon taliwala sa mga pagsulay

26

Davao City – Sa taas nga panahon, nagpadayon sa paghatag og serbisyo ang Radio Mindanao Network Inc. (RMN) pinaagi sa paghatod og balita, drama, kalingawan ug serbisyo publiko.

Sumala ni Pastor Leobardo Daugdaug, DXDC 621 RMN Davao Station Manager, wala miundang sa pagpangalagad ang network gani gilugwayan pa gawas sa istasyon ang paghatag og serbisyo pinaagi sa RMN Foundation diin nagpahigayon og mga aktibidades aron makatunol og tabang sa mga nanginahanglan ilabina kung dunay kalamidad bisan dunay COVID-19 pandemic.

Gipasabot ni Daugdaug nga nahimong inspirasyon sa mga kawani ug tagdumala sa istasyon ang mga tinguha sa Founder nga si Don Henry R. Canoy pinaagi sa iyang taas nga panlantaw inubanan sa kakugi ug lig-ong liderato nga maoy naabot karon sa RMN.

Gawas niini, gipadagan niya ang iyang kumpanya nga ang tratasyon sa mga empleyado daw sama sa usa ka membro sa pamilya nga nagbunga sa kaayuhan ug kalampusan nga gisugdan sa RMN Founder.

Nagtoo si Pastor Daugdaug nga ang kultura sa maayong liderato ni Mr. Henry Canoy maoy nasunod sa kasamtangang Presidente nga si Eric Canoy ug iya na usab kining inanay nga gipasunod sa mga batan-ong Canoy nga sila si Enrico Canoy ug Erika Canoy Sanchez nga magdala sa RMN alang sa daghan pang mabungahon ug malambuon nga katuigan.

“Dili ikalimud nga nagbunga gyud og kalampusan ug daghang kaayohan ang paningkamot nga gisugdan sa atong RMN Founder ug kining iyang legacy ug iyang kultura sa iyang lederato nga nagpadayon karon. Nagtoo sab ko nga kini ang magdala sa RMN ngadto sa daghan pang mga mabungahon ug malamboon nga katuigan para natong tanan,” segun ni Daugdaug.

RadyoMaN Bernard Pantallon




Facebook Comments