RMN Davao newsmen namulong sa media forum

Davao City – Sa panahon karon diin mikaylap na ang gitawag nga ‘fake news’, Daku ang nahimong epekto niini diha sa kredibilidad sa media ilabi na diha sa paghatud sa matuod nga balita.

Gani aron mas palawman pa ang maong hisgotanan, nagpahigayon og forum kaniadtong Mayo 16, 2018 ang Bachelor of Arts in Mass Communication students sa University of Mindanao (UM) nga gititolohang ‘Media Credibility: Bridging the World of Broadcast Media through Effective Communication’ diin naimbitahan isip mamumulong sa maong aktibidad ang DXDC anchors.

Tumong sa forum nga masabtan sa mga ‘future media practitioners’ ang mga mekanismo sa epektibong komunikasyon ilawom sa broadcast industry.


Gipasabot sa DXDC anchor nga si June Duterte sa mga estudyante sa UM nga dakong hinungdan ang nagkataas nga paggamit sa social media isip alternatibo sa ‘mainstream media’ sa paghanyag sa mga balita nga nagkuyanap karon ilabi dinha sa internet kun online.

Gani gi-awhag ni Duterte ang kabatan-onan nga mamahimong responsable sa pag gamit sa social media ug aron ma-edukar kini ilabi na kun unsaon sa pag-appreciate sa lehitimo ug masaligang balita kontra sa mga propaganda.

Sumala ni Jaira Mondez, 19 anyos, usa sa nahimong partisipante sa maong forum, nasabtan niya ang unod mismo sa maong topiko bahin sa kredibilidad sa media.

“They showered vital information and somehow an enlightenment in order to present a clearer picture of the reality outside the classroom,” saysay niini.

Gani gawas sa pagsiaw sa fake news ug sensationalized reportage subay pag-abot sa social media, dako sa gihapon ang pagto-o ni Jaira sa papel sa mainstream media.

“They still have roles in the society and they still have this major contribution for the development of the society,” gitataw niini.

Isip future media practitioner, gisugilon ni Jaira nga unahon usa niya pagpasabot sa katawhan kung unsaon pagtratar sa ‘fake news’ aron maedukar kini nga mukilatis una bag-o mag-share og balita online.

Usab nitampo sa iyang opinyon si Jason Amisola sa RMN Digital News Group kinsa nidasig sa mga millennial broadcasting students nga paningkamotang mamahimong consistent sa pagpangita’g credible news sources ug mas improbadong pagsulat sa ilang mga taho.

Facebook Comments