RMN Lenten Presentation: MAG-UUMA

11

Davao City – Matag-usa kanato adunay nagkalain-laing pamaagi kun unsaon sa paghandum ang Semana Santa kada tuig.

Mapa-Katoliko o laing relihiyon man, nagkadaiyang tradisyon ang ginahimo sa mga Pinoy gani ang uban ginahimo kini nga oportunidad aron usab maka-bakasyon, maka-pamalandong uban ang pamilya.

Apan aduna akoy nahibal-an nga bag-o sa akong pandungog samtang ako nakighinabi sa usa ka mag-uuma nga taga Purok 1, Dacudao, Calinan ning syudad sa Davao.

Gisaysay kanako sa usa ka 41 anyos nga mag-uuma nga si Renante Labuan ang ilang ginabuhat matag Semana Santa nga iya pang nasunod sa iyang apohan sukad niadtong kinse anyos pa lamang ang iyang panuigon.

Matud niya, naga-tanom sila og durian, cacao o di ba kaha lubi isip palihi sa Domingo sa kadlawon matag Semana Santa.

“Nakuha nako na kay gitudlo sa akong lolo, pag magpalihi mi og ing-ana, nindot ang resulta sa tanum, walay sakit-sakit, kada tuig tama-tama ang income namo kay nabuhat ang tulumanon,” matud ni Renante.

Dugang pa nga pinaagi sa pagbuhat sa maong palihi, aduna silay namatikdan nga pagsaka sa ilang income sa ilang mga tanom kada tuig.

Gawas sa palihi, giingon usab sa mag-uuma nga wala nawala kanila ang pagtambong sa mga aktibidad sa simbahan sama usab sa procession.

Kini usab ang higayon nga makatapok-tapok sila sa iyang pamilya sa ilang bukid ug magluto og mga pagkaong sagad i-preparar sa Semana Santa sama sa binignit ug uban pa sabayan og pagpangumusta sa matag-usa.

Dugang niini, nanghinaut usab ang mag-uuma nga hatagan og pagtagad sa katawhan ang maong komemorasyon sama sa paghatag og pagtagad sa Ginoo sa atong tagsa-tagsa ka mga kinabuhi tugbang sa sakripisyo Niya sa Iyang kaugalingon aron kita maluwas.

“Importante sa atoa ang Semana Santa kay diha gipahinumduman ta nga giluwas ta Niya, nagsakprisyo Siya sa atoa maong hatagan nato og higayon nga paminawon ang mensahe sa Ginoo… Ang Ginoo nagsakripisyo alang kanato maong di nato kalimtan ang Ginoo sa tanang higayon sa atong kinabuhi,” segun ni Labuan.

Si Labuan usa lamang sa daghang mga mag-uuma nga naga-ampo nga giyahan sa Ginoo kon unsaon pagpalambo sa ilang mga pananum alang usab sa ilang pang-adlaw-adlaw nga panginahanglanon.

Ning maong mga pamaagi, kitang tanan seguradong mapahinumduman ug makapamalandong ingon man makapalig-on sa atong komunikasyon diha sa Ginoo, ang atong relasyon Kaniya, ang paghatag og pagtagad sa gihimong sakripisyo sa Anak sa Ginoo alang sa kaluwasan sa tawo gikan sa pagkahigot sa gahum sa sala.

Tinuod gayud nga dili kita perpekto, usahay mahikalimot nga unahon ang Ginoo ug makahimo gihapon og mga sala apan ang makanunayong gugma ni Hesu Kristo kanato maoy dakung tinubdan sa walay paghubas nga paglaum sa tagsa-tagsa nato ka mga kinabuhi ibabaw ning kalibutan.

RadyoMaN Renz Barbarona

Facebook Comments