ROTC revival gipaluyuhan

24

Davao City – Nalipay ang usa ka taas nga opisyal sa Task Force Davao sa subling paghibalik sa Reserved Officers Training Corps kun ROTC Course kay mao kini ang gikinahanglan karon sa hut-ong sa mga batan-ong estudyante.

Gibutyag ni TF Davao Spokesperson Lt.Col. Randolf Cabangbang nga daku kini og ikatabang diha sa pagdisiplina ug paghulma sa maayong pamatasan sa mga batan-on.


Gawas niini, mabalik pag-usab ang hagbay rang nawala nga patriotism diha sa kasingkasing sa mga batan-on karon kun mapatuman na ang mandatory ROTC sa mga tulonghaan sa kolehiyo sa tibuok nasud.

Segun ni Cabangbang nga sukad giwala ang ROTC, daghan sa mga batan-on karon nalihis na sa maayong dalan ug sagad kanila mipaingon sa dalan sa kaalaotan uban ang mga militante.

Imbes nga magtinarong og pagtungha aron mabugtian ang mga ginikanan, nag-apil-apil naman hinoon sa mga protesta ug misulod sa hut-ong sa mga militant organizations aron makigbatok sa gobyerno.

Dili lang kay nawala ang pagka-nasudnon sa mga batan-on karon apan naguba usab ang ilang kaugmaon ug nahimo pa gyod nga kriminal diin mao kini ang bunga sa pagwagtang sa ROTC pila na ka tuig ang nakalabay.

Kung kahinumdoman, giwagtang ang ROTC sa nasud tungod sa mga reklamo sa mga estudyante sa kolehiyo nga sila gi-abusohan sa mga officers samtang nag-training kun kining practice gitawag nga ‘hazing.’

Apan positibo si Cabangbang nga mas propesyonal na unya ang mga officers nga magdala sa ROTC busa malikayan na unya ang giingong wala’g tuo nga abuso ngadto sa mga estudyante nga mupailawom sa nahisgotang matang sa training.

Gidugang sa maong opisyal nga ang Armed Forces of the Philippines (AFP) nagkinahanglan og dugang ihap sa mga reserved officers sarang ma-activate panahon sa mga pagsuway sama sa kalamidad ug giyera.

RadyoMaN Joel Viray

Facebook Comments

From Advertisers