RMN Laoag — Trending kadagitoy a gundaway iti social media ti panagkallaysa iti tomboy ken babae iti Siudad ti Laoag.
Nabigbig ti groom a ni Mariel Cris Zuniga a taga Barangay Abkir, Vintar, Ilocos Norte ken ti bride a ni Irish Dalere a taga Sta. Praxedes iti Probinsia ti Cagayan.
Ti groom a ni Mariel ket agtrabtrabaho iti pribado negosyo iti nasao a siudad ken ti nalasbang a bride a ni Irish ket agtrabtrabaho iti lokal a gobierno iti ili ti Sta. Praxedes.
Naisayangkat ti seremonya ti kasar iti maysa a restaurant iti Laoag babaen kenni Reverend Regen Luna, Obispo iti Independent Catholic iti Probinsia ti Cavite.
Iti pakasaritaan ti ayat dagiti dua, innem a tawendan nga agayan-ayat ken nagam-ammoda laeng iti maysa a boarding house iti met laeng Laoag.
Kabayatan iti ballaigi a panagkallaysada, saan a maliklikan dagiti nagduduma a reaksyon ti netizens. Ada dagiti pabor ken saan nga umanamon.
Nupay kasta, awan ti bibiang dagiti agasawa kadagiti mabasbasada ken mangmangegda, ngamin, naakseptar daytoyen ti pamilya iti agsungbangir a partido
Bernard Ver, RMN News
