SECRETS OF MARRIAGE

Davao City – Ang kaminyoon gasa kini gikan sa Dios alang sa lalake ug babaye nga nagkahigugmaay ug sila usahon pinaagi sa sakramento sa panagsaad atubangan sa Ginoo ug sa balaud sa yuta sulod sa simbahan.

Apan ang pangutana, unsa ba’y sekreto aron maglungtad ang gugma, pagsinabtanay, ug relasyon?

Matud ni Agni May Pernes, kanhi professor sa Koinonia Theological Seminary Foundation Incorporated ug 13 na ka tuig nag-practice isip Christian counselor, siya mipaambit sa pipila ka mga reminders kun tips aron magdugay ang kaminyoon denhe ibabaw sa kalibutan.


Una, gikinahanglan abli kanunay ang komunikasyon aron dunay linya ang mag-asawa nga mag-istorya hilabi na kung dunay problema ug nagkinahanglan og hinanali nga kasulbaran.

Ikaduha, ang respetohanay sa magtiayon importante kini sa matag usa kanila sa walay pagtan-aw kung kinsa kanila ang mas dunay dakung naabot sa kinabuhi.

Ikatulo, gikinahanglan paharion ang gugma isip pangdepensa sa problema nga muabot sa kaminyoon gumikan sa taras sa kinaiya ug batasan ug isyu sa sa matag usa kanila.

Ug ika-upat, himoong sentro sa kinabuhi sa mag-asawa ang Dios nga si Hesu Kristo nga maoy sekreto alang sa malipayon ug malungtaron nga pagminahalay sa matag usa kanila.

Dugang ni Pernes, ang kaminyoon nakaangkla sa gugma sa Dios ug dili gayod matarog ni maguba ingon man mulahutay ang ilang paghigugmaay hangtud sa ilang pagkatigulang.

Ang unang magtiayon nga nakadawat sa gasa sa kaminyoon mao sila Adan ug Eba diin ang ilang panagkuyog sulod sa tanaman sa Eden gipanalanginan sa Dios una pa man sila nalingla sa bitin ug nakasala.

Ang rason nganong gibutangan og kasingkasing ang tawo kana aron maghari ang gugma kay mao kini ang hinagiban sa pakigbatok sa matuod nga mga kinaiya nga manggula sa pila ka tuig nga panag-uban.

Kung mas dako ang gugma sa mag-asawa, lisod gun-ubon ug bulagon ang ilang panag-uban bisan og abton pa og wala’g tuo nga suliran nga sinambogan sa lahi-lahi nga batasan ug personalidad sa duha.

RadyoMaN Joel Viray

Facebook Comments