Davao City – Arestado ang usa ka security guard human kini nangharas og mga tawo ug nagpabuto sa iyang armas kagabii.
Respondent naila nga si Julius Quistado Catingub, hamtung ang pangidaron ug lumad nga taga Koronadal South Cotabato.
Sumala sa report gikan sa Talomo PNP, nakig inom si Andy Paquim nga taga Suawan Marilog sa usa ka compund sa may NHA Matina bandang alas 12 pasado sa kadlawon kun diin asa usab nag duty ang respondent.
Matod pa, kalit miabot ang nahisgutan nga sekyu atubangan sa complainant ug gihulbot niini ang iyang armas ug gikasa tungod buot niya mamusil og saag nga iro sa lugar.
Nasayran nga hubog niadtong higayona ang respondent ug gialalayan kini pasulod sa compound apan pagsulod niini kalit niyang gipabuto ang iyang baril sa usa ka higayon.
Miabay ang pipila ka mga gutlo migawas ug balik ang respondent ug nag wara wara sa iyang pistola hinungdan nga gilipat sa complainant uban sa iyang mga kauban si Catingub ug nakulatahan kini dayon nailog ang armas.
Daling nananawag og police assistance ang complainannt ug gi endorso ang usa ka 9mm caliber pistol nga dunay unom ka bala.
Gipangitaan og mga dokumento ang dinakpan sa pusil apan gumikan wala kini mapakita gibalhug kini sa Talomo precint.
RadyoMaN Paul Canono
