Security ug law enforcement operations, gipakusgan sa AFP

Malaybalay City, Bukidnon – Padayon nga nagapahigayon ug Security ug Law Enforcement Operations ang 403rd Infantry “Peacemaker” Brigade sa ilang area of responsibility.

Kini human mukabat sa 700,000 ang damyos sa usa ka Portable Banana Processor sa DOLE Philippines, Inc. nga nahimutang saSitio Sta. Cruz, Brgy. Casisang, siyudad sa Malaybalay human kini gisunog sa mga gituohang mga miyembro sa bandidong grupo niadtong Biyernes sa kadlawon.

Matud ni Capt. Norman Tagros ang Civil Military Officer ug spokesperson sa 403rd nga nagpadayon ang ilang paglakag sa mga nagbuhat sa maong pagpangsunog nga nasayran usab nga mga lumulupyo gihapon sa mga kasikbit nga mga kumunidad.


Samtang nagpahigayon ang kasundaluhan ug kapulisan sa maong kalihukan tungod sa panghitabo, giawhag usab niini ang tanang katawhan ilabi na ang mga opisyales ug ang Kapitan sa Barangay nga tumanon ang ilang gipanumpaan nga katungdanan nga mao ang pagpatuman sa balaud ug sa mga lokal nga ordinansa, ug ang pagmintinar sa kalinaw ug kahusay.

Gi-aghat usab sa militar ang publiko nga makigtinabangay sa ilaha pinaagi sa pag-monitor, pagbantay, ug pag report sa mga kadudahan nga mga kalihukan sa tagsa-tagsa ka dapit.

Mamahimong kining i-taho sa 403rd hotline number nga 0927 406 0183.

Sigun ni Tagros nga ang matuod nga kalinaw ug kahusay magpabilin nga idlas kung ang katawhan dili magpakabana, mangilabot, ug makigtinabangay.

Facebook Comments