Gipahugtan pa sa mga kasundaluan ug kapulisan ang seguridad pasulod sa Barangay Dumalaguing sa lungsod sa Impasugong human ang nahitabong pagbomba sa bukiron nga bahin sa maong barangay sa mga kasundaluan adtong milabayng Martes sa gabie.
Wala pa masuta ang rason sa maong pagbomba apan dako ang posibilidad nga presinsya sa mga rebeldeng New People’s Army (NPA) ang hinungdan human nga napatay ang iladong lider nga si Jorge Madlos alyas Ka-Oris sa susamang lugar adtong milabayng Sabado.
Gitugutan lamang nga makasulod sa maong area ang mga residente sa Barangay Dumalaguing ug kinahanglan lang magpakita og mga identification cards ngadto sa mga kasundaluan ug kapulisan nga nakabantay sa mga checkpoints.
Samtang ginahulatan pa sa pagkakaron ang opisyal nga pamahayag sa kasundaluan sa nahitabong pagbomba sa bukiron nga bahin sa Impasug-ong, Bukidnon.
