Hinikayat ni Senate Minority Leader Koko Pimentel si Senate President Chiz Escudero na magpatawag na ng caucus sa mga senador para mapag-usapan ang impeachment trial ni Vice President Sara Duterte.
Ayon kay Pimentel, kakausapin niya sa lalong madaling panahon si Escudero para magsagawa na ng caucus sa mga senador tungkol sa magiging hakbang ng Senado sa impeachment case ni Duterte.
Susulatan niya rin si Escudero para ipaliwanag at tukuyin sa constitutional provision at sa rules of impeachment gayundin ang kanyang conclusion na hindi kailangang naka-sesyon ang Senado bilang legislative body para makakilos sa impeachment.
Naunang sinabi ni Pimentel na mayroong legal na basehan para kumilos ang Senado at aksyunan ang articles of impeachment laban kay VP Sara sa pamamagitan ng pagpapatawag ng sariling special session para makapag-convene ang mataas na kapulungan bilang impeachment court.
