Senado kalampagon sa grupong ‘APOR’ kung mapasar ang SB 1869

Davao City- Nagbahad karon ang grupong Arise People of Revelation nga ilang kalampagon ang Senado kon ugali makalusot sa plenaryo ang Senate Bill No.1869 kon mas nailang Philippine Center for Disease Prevention and Control Act.

Gibutyag ni APOR Convenor Pastor Cherie Patino nga dakong rally ang ilang himoon aron kalampagon ang Senado kung mapasar ang ilang gisupak nga balaudnon nga mao ang SB 1869 nga giduso ni Senadora Pia Cayetano.

Sigun ni Pastora Patino nga ang tanang kaubanang relihiyon sa APOR nagkasinabot nga maglusad og pagbaktas atol sa ilang pagahimoon nga rally gikan Mindanao paingon na sa kaulohan.

Suma ni Patino nga ilang ipakita ang dako nilang pagkontra sa SB 1869 tungod sa ilang pagtoo nga pagpangyatak sa katungod sa pagpili kon magpabakona ba o dili ang usa ka tawo.

Andam matud pa sila nga maabtan og pila ka adlaw magprotesta atubangan sa Senado aron lang ilang mapalanog ang ilang pagsupak sa maong balaudnon.

Gilaraw sab ni Pastora Patino nga makig-istorya sa upat ka mga Senador nga taga-mindanao ug labaw na kang Senate President Migs Zubiri aron ilang mapasabot ang ilang mga punto ngano kontra sila sa balaud.

Hinoon andam dad-on sa Korte Suprema ang naasoy nga hisgotanan kon ugali makalusot sa senado ug mapirmahan ni Pangulong Bongbong Marcos ang SB 1869 aron hingpit mabalaud kini.

RadyoMaN Joel Viray

Facebook Comments