Senior citizen nabanggaan og motor, patay

125
Davao City – Patay ang usa ka senior citizen nga si Lolita Dela Cerna, 62 anyos, residente sa Villa Mercedes, Panacan, syudad sa Davao human nabanggaan og motor samtang mitabok sa dalan sa San Miguel, Panacan, Davao City.

Sa imbestigasyon sa Sasa PNP-Traffic Section, wala makabantay ang driver sa motor nga si Dimangadap Pasod Jr., 33 anyos, minyo, vendor, nagpuyo sa samang dapit nga milabang ang biktima rason nga nadasmagan niya ug tungod sa kakusog sa impact sa pagbangga, nabunal ang ulo sa semento nga bahin sa biktima.

Paspas sab nakaresponde ang Central 911 Medic Ambulance ug gihatud sa Southern Philippines Medical Center si Dela Cerna, apan gideklarang patay na subay sa kompirmasyon sa igsoon nga si Arlene Dela Cerna.

Temporaryong giditinar sa Sasa Police Station ang driver sa motor aron kasohan og Reckless Imprudence resulting to Homicide.

RadyoMaN Joel Viray

Facebook Comments