Davao City – Gikabalak-an sa mga residente sa Brgy. 31-D ning syudad nga matabokyan sila og sakit nga dengue tungod sa mga dagkung ligid sa sakyanan nga mamahimong puy-an sa mga lamok nga anaa kilid mismo sa mga dalan. Hinungdan kini nga nagpaabot ang mga concerned citizen sa maong lugar sa ilang reklamo ngadto sa programang Serbisyong Straight to The Point.
Sa dihang gikuhaan og pahayag sa DXDC si Konsehal Olivia Pinoon, ang chairman sa Committee on Health and Services sa Brgy. 31-D, gisulti niya nga dugay na nilang gihatagan og aksyon ang maong mulo sa mga residente. Apan lagi kay gisabot usab nila nga negosyo kini sa pipila, dili gayud malikayan nga dunay pipila nga dili mosunod sa mga pahimangno sa barangay.
Tungod niini, subling nanawagan ug nagpasidaan si Pinoon ngadto sa mga taga-Barangay 31-D, ilabi na sa mga dunay negosyo og ligid sa mga sakyanan, nga sundon ang dugay na nilang nasabutan aron malikayan nga dunay pagkalat sa sakit nga dengue sa ilang lugar.
Nasayran nga duna na’y namatay sa maong barangay tungod sa sakit nga dengue.
Regular nga nagahimo og checking ug pagpanghinlo ang barangay council sa 31-D ug nagabisita usab mga personahe sa City Health Office sa maong lugar.
RadyoMaN Misel Miral
