*SIEN MIL DE PESOS REWARD PARA CON EL SUSPECHAO NA MATANZA CON PIERRE MACAPIL*
*BHONG SIMBAJON*
El Fraternal Order of the Eagles ta ofrece aura el cantidad de sien mil de pesos (PhP100,000.00) para con el masquin quien persona que fuede enseña si quien na el suspechao o mastermind del matanza con el diila antes chapter president aqui na ciudad de Zamboanga.
Na un carta del FOE National President Eagle Locio Ceniza, ele ta apela con el Chief PNP Ronal Dela Rosa para hace de fronto el imbestigasyon na matanza con Pierre Adrian Diamos Macapil para fuede ya dale justicia con el familia que dolorido aura desfues el brutal matanza con el victima.
El FOE que ta composita veinte-res mga rehiyon aqui na entero paiz ta condena con el matanza del diila uban quien ya anda lang asisti con otro uban Eagles en tiempo de necesidad.
Asegun pa con Ceniza, si quien man persona el fuede dale el masquin un “lead” para fuede resolva el crimen con Macapil y fuede identifica con el tirador quien ya liquida conele, hay recivi con el sien mil de pesos rewards desdel FOE organization.
Si ta acorda, con Pierre Macapil ya tira el desconosido riding tandem suspechao alas-dos y media del Setyembre 6, 2017 na vicinidad del Purok 9, Barangay Crossing, Sta. Clara, Naga, Zamboanga Sibugay Province. El mga imbestigador del policia ya fuede recuvri cuatro mga basiyo del caliber 45 na lugar del insidente. – *Bhong Simbajon/RMN News*
