SIM Card Registration Bill, aprubado na sa 3rd reading sang Kamara

Gin-aprubahan na sang Kamara sa ikatatlo kag ulihi nga pagbasa ang House Bill 7233 ukon ang SIM Card Registration Bill.

Sa boto nga 167-6, lusot sa Kamara ang nasambit nga hagna nga tinutuyo nga buligan ang mga law enforcement agencies sa pag-track down ukon pagpangita sang mga kriminal nga nagagamit sang mobile phones nga may postpaid kag prepaid SIMs sa ila modus, kaangay sang kidnapping kag iban pa gid nga mga petty crimes.

Sa idalum sang hagna, ginmanduan ang Public Telecommunication Entity (PTE) ukon ang direct seller nga i-register ang ginabaligya nga SIM cards.


Pero kinahanglan man nga maghatag sang valid identification nga may picture ang magabakal sang SIM card para masigurado ang identity sini.

Tanan nga mga direct sellers ang ginamanduan man nga i-register ang SIM cards sa isa ka registration form nga nalakip ang bilog nga pangalan, birth date, gender, address kag ang ginpresentar nga ID sang end-user.

Ang mga foregin nationals naman ang kinahanglan nga i-rehistro ang ila pangalan, passport number kag address.

Ginamanduan man sa nasambit nga hagna ang PTE nga magsumiter sa Department of Information and Communications Technology (DICT) sang verified list sang ila current authoritzed dealers ukon agents sa bilog nga pungsod. – RCSG / iFM Bacolod

Facebook Comments