Cauayan City – Isinagawa ang isang pagpupulong sa pagitan ng Southern Isabela Medical Center (SIMC) at ng Pamahalaang Lokal ng Lungsod ng Santiago tungkol sa pagtatayo ng isang Primary Health Care and Recovery Facility sa bagong gawang LGU Health Facility.
Pinangunahan ni Dr. Melchor C. Dela Cruz, Jr., Medical Center Chief II ng SIMC, at ni Mayor Atty. Alyssa Sheena P. Tan ang pulong, kasama ang City Health Office Head na si Dr. Genaro Manalo at iba pang kawani ng LGU.
Tinalakay sa pagpupulong ang tamang paglalaan ng espasyo para sa iba’t ibang serbisyong pangkalusugan, suplay ng gamot, karagdagang diagnostic services, at tulong medikal para sa mga pasyente.
Layunin ng proyektong ito na mapabuti ang kalidad at accessibility ng serbisyong pangkalusugan sa lungsod. Sa pamamagitan ng pagtutulungan ng SIMC at LGU, inaasahang mas mapapalakas ang sistema ng kalusugan upang matugunan ang pangangailangan ng bawat Santiagueño.
