SPMC: COVID-19 ward ug ICU anaa na sa warning level

20

Davao City – Miabot na sa warning level ang bed capacity sa Southern Philippines Medical Center (SPMC) subay sa padayong pagsaka sa active cases sa COVID-19.

Sa datos nga gipagula sa SPMC sa Oktubre 4, 2020, 96.97% kun 32 na ng occupied sa 33 sa ICU beds, samtang 93.72% o 209 sa 223 ka ward beds ang occupied na sa mga COVID-19 positive.

Sa interbyu sa DXDC RMN Davao kang Dra. Marie Yvette Barez, Infection Prevention and Control Unit sa SPMC, gibutyag niini wala nay kabutangan pa sa uban pang mga pasyente tungod usab sa SPMC gidala ang ubang pasyente nga gikan sa laing rehiyon.

“Ni-over na ta wala namiy kabutangan, over pa ta sa 100% (occupancy sa beds),” sumala niini.

Gibutyag ni Barez nga nakig-alayon na sila sa Regional IATF alang sa imuntar nga usa ka hospital command para kabutangan og pasyente.

Nag-abli pa og usa pa ka ward sulod sa SPMC nga mo-akomodar og 10-15 pasyente, apan sumala niini problema gihapon tungod walay mga staff.

Nakigkoordinar usab ang SPMC sa PNP alang sa kakulangon sa staff apan dili usab tanan mga rehistradong nurses ug adunay pipila mahadlok matud pa mo-duty tungod sa taas nga risgong atubangon.




Ni-apelar kini sa publiko nga motamod sa health protocols tungod kay sagad nagkompyansa na sa mas giluagang quarantine status.

RadyoMaN Aimee Guinita

Facebook Comments