Spray plane nahagsa sa Maco, piloto luwas

41

Davao City – Luwas ang piloto sa usa ka aerial spray plane human nahagsa ang maong gisakyan sa Purok Avocado, Barangay Pangi, Maco, Davao de Oro alas-7:15 kagahapon sa buntag (October 13, 2021).

Sa interbyu sa DXDC RMN Davao kang Police Major Jefferson Masirag, Office in Charge (OIC) sa Maco Municipal Police Station (MPS), giila niini ang piloto sa aerial spray plane nga mao si Captain Rotillo Fuentes, kapin 60-anyos, taga Panacan, Davao City.


Subay sa imbestigasyon, ikalimang spray na sa saging sa piloto sa Lanavan, Farm 1, MD Rio Vista sa dihang kalit na lamang nagkaproblema ang makina sa eroplano hinungdan nga nawad-an og kontrol ang pilot rason nga nahagsa kini sa lugar.

Hinuon, walay injuries nga naangkon ang piloto apan anaa sa 47 ka saging ang nadamyos.

Pahimangno sa pulis nga kanunay nga i-check ang eroplano o unsa mang sakyanan ayha gamiton labi na kung daan na kini, aron kalikayan ang susamang insidente.

“Most likely, kanang sa ilahang eroplano, dugay-dugay na man gyud. Then ang report pagka muabot na sa amoa, engine failure (ang hinungdan). Dapat continuous nga check up gyud ang kinahanglan ana kay medyo tigulang na ang ilahang eroplano,” sulti ni Masirag.



Kahinumduman nga aduna usay aerial spray plane nga nahagsa sa Pantukan, Davao de Oro niadtong September 23, 2021 diin ‘engine malfunction’ usab ang gilantaw nga hinungdan sa disgrasya.

RadyoMaN Kirby Manzon


Facebook Comments