Sta. Cruz road crash: 19 anyos lalaki naputla’g tiil

Davao City – Miresulta sa pagkaputol sa tiil sa driver sa motorsiklo ang aksidenting pagbangga sa gimaneho niining sakyanan sa usa ka pickup truck sa Sitio Quinocol, Brgy. Darong, Sta. Cruz, Davao del Sur, alas 11:00 sa buntag.

Sa interbyu sa DXDC RMN Davao kang Police Major Crisaldo Gaila, Acting Chief of Police (COP) Sta. Cruz Municipal Police Station, giila ang driver sa motor nga si Roben Lawa, 19 anyos, trabahante sa Franklin Baker, taga Davao Occidental ug kasamtangang nagpuyo sa Sta. Cruz, Davao del Sur.

Saysay ni Gaila, padulong sa Davao City ang pickup nga gimaneho ni Kenneth June Sabuga-a, taga Digos City sa dihang kalit na lamang misulod sa lane sa pickup ang motorsiklo resulta sa ilang pagbangga.


“Kining motorsiklo gikan siya sa Barangay road, sa wala nga dapit. So nikalit siya’g cross hinungdan nga nabanggaan siya. Nag abot man sila sa lane sa Navara pickup,” saysay ni Gaila.

Sa pagkakaron, gikustodiya una ang driver sa pickup sa Sta. Cruz Municipal Police Station, samtang si Lawa gidala sa Southern Philippines Medical Center (SPMC), syudad sa Davao.

Panawagan sa police official sa mga motorista nga kanunay’ng magmatngon ug mag-amping ug sundon ang regulasyon sa paggamit sa karsada.

“Ang akong panawagan sa mga motorista, sa publiko nga kung mugamit ta og karsada nga pampubliko magmatngon gyud ta, mag-amping. Unya atong sundon ang mga balaod sa traffic, mga regulasyon unsaon paggamit sa karsada aron makalikay kita sa mga sama ani nga insidente,” esplikar sa police official.

RadyoMaN Kirby Manzon

Facebook Comments