Davao City – Nanawagan og kooperasyon si Sto.Tomas Mayor Ernesto “Tatay Erning” Evangelista sa Davao del Norte, nga padayong sundon ang kampanya sa gobyerno batok Coronavirus Disease 2019 (COVID-19) human kini nagpositibo usab sa virus subay sa gipagawas nga resulta sa Davao Regional Medical Center (DRMC) sa Tagum City kagahapong adlawa (October 22, 2020).
Atol sa public briefing sa Office of the Municipal Information Officer – Sto.Tomas LGU, gibutyag ni Mayor Evangelista nga mismong siya wala nasayud kung asa niini nakuha ang virus apan nasayran nga na-expose kini sa usa ka COVID-19 positive niadtong Oktubre katorse ning tuiga.
“Bisan ako karon maglisod ko og trace if asa nako nakuha ang virus. So kung mahimo, mag amping gyud ‘tang tanan ug naghangyo ko sa inyo’ng pag ampo sa akong kaayohan, kay kining virusa ni wala gyuy tambal ‘ni as of now,” saysay ni Evangelista.
Matud sa mga doktor nga ‘symptomatic’ kun adunay simptomas sa virus si Evengelista apan ‘mild cases’ lamang ang sitwasyon sa opisyal.
Sa pagkakaron, gipailawom na sa ‘strict isolation’ ang Alkalde ug ipailawom sa RT-PCR (reverse transcription–polymerase chain reaction) test. Samtang, padayon ang contact tracing sa mga nahimamat niini niadtong October 14, 2020 gawas sa 20 ka Local Government Unit (LGU) personnel nga iyang nakauban.
Gipaniguro usab nga dili maapektuhan ang operasyon sa LGU-Sto. Tomas bisan og naa sa isolation, ang Mayor gihapon ang mag preside ug manguna sa mga panagpulong ug magdesisyon alang sa gimbuhaton sa lokal nga gobyerno luyo sa COVID-19 pandemic.
Nasayran nga si Mayor Evangelista ang pinaka-unang Mayor sa Davao del Norte nga nagpositibo sa COVID-19.
RadyoMaN Kirby Manzon
