Sto. Tomas PNP: Driver sa motor mishap nasayrang minor nga hubog

23

Davao City – Migawas sa inbestigasyon sa Sto. Tomas Municipal Police Station nga daghang traffic violations ang nahimo sa biktima sa vehicular accident nga natigayon sa Barangay Tibal-og, National Highway, Sto. Tomas, Davao del Norte.

Gikumpirma sa hepe sa Sto. Tomas PNP nga si Police Major Frederick Deles atol sa interview sa DXDC RMN Davao nga usa ka menor de edad nga nagmanehong hubog ang nalambigit sa maong disgrasya.

“Minor siya og nag-drive nga nakainom unya wala siya’y laing kabangga,” sumala niini.

Subay sa traffic report sa kapolisan, nawad-an og kontrol ang 17 anyos nga biktima hinungdang mibangga ang gimanhimong motorsiklo sa usa ka sign board.

Nakahiagom kini’g daghang bun-og sa kalawasan hinungdang gihatod sa tambalanan.

Subay niini giklaro sa Sto.Tomas LGU pinaagi sa ilang official statement sa facebook page ngadto sa publiko kinsa matud pa gibasol ang gimuntar nga sign board sa maong aksidente.

Samtang gihimakak sa LGU sa Sto. Tomas ang pasangil, matud pa usa lamang kini ka taktika aron sa paglihis sa tinuod nga rason nga gituyo aron makuha ang atensyon sa mga tawo gikan sa tinuod sa pagmaneho nga wala’y helmet o bisan unsang gamit nga panalipod, walay lisensya ug nagmanehong hubog nga maoy mas delikado.




Sa datos sa Municipal Health Office, 95% sa tanang vehicular accident sa munisipyo sa Sto. Tomas nahitabo tungod sa pagmanehong impluwensyado sa bino (liquor).

Samtang si Mayor Ernesto Evangelista nagpahigayon og occular inspection niadtong Lunes sa gabii sa tanang mga lugar nga gibutangan sa mga karatula sa trapiko.

Gimandoan sa Alkalde ang Municipal Traffic Management Unit ug General Services Office nga magbutang og mga reflective sticker aron malikayan ang disgrasya sa kadalanan ug aron maalerto ang mga motorista sa presensya sa mga steel traffic sign sa mga kadalanan.

RadyoMaN Aimee Guinita

Facebook Comments