Sub-Leader of Terrorist Group Dawlah Islamiya kag 13 pa ka miyembro sang NPA nagsurender sa Sultan Kudarat.

Boluntaryo nga nagsurender ang sub-leader sang Dawlah Islamiya Maguid Terrorist Group nga ginkilala kay Khalid Kalaing alyas Khalid, 57-anyos sa headquarters sang 7th Infantry Battalion nga nakabase sa Isulan, Sultan Kudarat
Suno kay Lt. Col. Romel Valencia, Commanding Officer sang 7th Infantry Battalion ang terrorist group sub-leader ang nagaoperate sa probinsya sang Sultan Kudarat bitbit ang M635 rifle, M16A1 rifle, calibre .30 M1 carbine, M14 rifle, calibre .30 M1 garand rifle, magazines kag mga bala sang mga nagkalain-lain nga kalibre sang armas luthang.
Sa subong padayon ang koordinasyon sang JTF Central sa Local Government Units para sa paghatag sang cash kag livelihood assistance subong man benepisyo sang mga terorista nga grupo nga nagsurender.
Sa pihak nga bahin 13 pa ka miyembro sang Communist Terrorist Group, New People’s Army (CTG/NPA) sa idalom sang Sub-Regional Command (SRC) – Daguma Far South Mindanao Region ang nagsurender sa Kalamansig, Sultan Kudarat .
Dala man sang mga ini sa pagsurender ang anum ka armas luthang kag mga nagkalain-lain nga war paraphernalia.
Nakabaton naman ang nasambit nga mga former rebels sang immediate cash kag livelihood assistance halin kay Governor Suharto Teng T. Mangudadatu kag Kalamansig Mayor Rolando Garcia.
Nagatinir naman ang mga ini sa halfway house sang probinsya samtang ginapaidalom sa reorientation kag pagproseso sang ila national assistance kag livelihood initiatives sa idalom sang Enhanced Comprehensive Local Integration Program (E-CLIP).
Sa subong suno kay Major General Juvymax Uy, Commander sang JTF Central kabug-usan na nga 73 ka mga miyembro sang NPA ang nagsurender sa JTF Central halin Enero subong nga tuig kag yara na sa 66 ka assorted firearms kag eksplosibo ang nasurender.

Facebook Comments