Davao City – Karon nga deklarado na ang halos tanang mga bag-ong set sa barangay officials, makatarunganon lamang nga ang tawo na usab ang mag-demand ngadto kanila.
Human nga sila gitunolan sa tumang pagsalig sa katawhan sa kabarangayan, panahon na usab karon nga ang tawo ang pa-istoryahon, dunggon ug paminawon sanglit kita man ang labing mahukmanon kalambigit sa isyu sa barangay ug kay karon na man ang gitawag nga ‘Day of Judgment & Reckoning.’
Pipila sa mga nag-unang suliran nga buot maatiman sa mga lungsuranon nag-apil sa krimen, kahusay ug kalinaw, gangsterism, juvenile delinquency, youth gangs and rioting, kawat, baradong canal systems panahon sa pag-ulan ug pagbaha, basura, igong supply sa tubig-mainum ug sufisyenteng sugang dagitab kun kuryente, trabaho, livelihood opportunities ug uban pa.
Gilauman karon sa mga botantes nga sa mosunod nga duha ka tuig, atimanon sa mga barangay officials ang tanang yangungo sa tawo gikan sa gagmay nagdto’s dagku, kutob ra usab sa makaya nila sanglit dili man tanan ilang mahatagan ug igong atensyon, pagtagad ug resolusyon.
Ang importante mao nga sa mga butang nga gisangguni sa mga constituents ngadto sa ilang mga kadagkuan sa barangay, adunay itomar nga aksyon gilayon ug dili kay ugma-ugmaon pa ‘ta.
Atong ipakita ngadto sa mga nagsalig kaninyo niadtong May 14 nga dili tinood kanang naandang obserbasyon sa mga voters panahon sa pagpangampanya: Nga kuno ang saad gihimo lamang aron pakyason, mao man gani nga sila molaum apan dili na lang mosalig aron dili masakit kun pakyason.
Angay natong otrohon ang atong karaang kostumbre: Nga matag panaad nga gibuhian niadtong campaign period, inyo gyud kadtong barugan ug tumanon haron ang katawhan matagbaw sa inyong pagpanerbisyo.
RadyoMaN June Duterte
