Suma Total sa Straight to the Point: Demolisyon

Davao City – Gisugat kita karong buntaga sa mga taho nga pagpatuman sa atong mga awtoridad sa orden sa korte kun ‘writ of demolition’ alang sa usaka gikabangiang luna kun propyedad nahimutang dihang dapita sa may Barangay 26-C Salmonan Boulevard ning dakbayan sa Davao.

Kita nanghinaut nga sa dihang ipursige na sa mga tinugyanan sa balaud ang mando karong alas-8:00 ang oras sa kabuntagon, mapatuman kini sa malinawon ug hilway nga pamaagi, walay tawong mapasakitan, mapagan or bin ba kaha makabsan sa kinabuhi ilabi na kun magmagahi ang mga hingtungdang residente sa pagtuman sa balaud.

Angay masabtan sa tanan nga kining atong sosyedad nag-operate pinasikad ug pinasubay lamang sa hustong mga lagda sa balaud kun ‘rule of law, not the rule of men or the rule of the mob.’


Buot ipasabot, kun aduna na ganiy mando ang hukmanan sa usaka butang, angay gayud kining sundon ug tahuron sa tanan.

Dili angay gamiton sa mga maapektuhang lungsuranon pananglitan sa Salmonan Boulevard ang rason nga kapobrehon kay dili kana igong justification nga maghuramentado sila bahala na’g masakitan – mangamatay kun mangamatay – sa kawsa nga wala man usay kapanukaran sa balaud.

Sa parte sa gobyerno, klaro ang mandato kanila sa balaud nga mao lamang ang pagpatuman sa kada letra sa lehitimong orden, ang pagtagana sa relokasyon una pa man ang pagbungkag sa mga illegal structures aron walay tawong mawad-an ug pandong sa ilang mga ulo ilabi na alang intawon sa mga gagmay’ng kabataan.

Gi-require usab sa balaud ang negosasyon apan moganar lamang kini kun ang mga anaa sa alanganing sitwasyon mosunod kun motuman lamang sa balaud ug dili ipamugos ang ilang kagustuhan – bisan kun kini dakung sayop nga baruganan.

RadyoMaN June Duterte

Facebook Comments