Suma Total sa Straight to the Point: Purging

23

Davao City – Karon nga gidala na ni Pres. Rodrigo Duterte sa local government level ang kampanya kontra korapsyon, krimen ug droga, malaumon ang nasud nga magsugod na unya ang hingpit nga paglimpyesa sa entero makinaryas sa kagamhanan.

Ang pagbalasa sa lebel sa kasyudaran ug kabarangayan angayan lamang sanglit mag-unsa man ang war versus corruption et al kun dili matandog ang uban pang nagdula sa maong dautang binuhatan?

Ang pagratsada sa krusada kontra hawshiao ug binuang sa pinaka-ubos nga ang-ang posibleng motandog sa maong sektor sanglit basi sa talaan mismo sa pamuno-nasud, mokabat man sa 40% sa mga lideres sa kabarangayan – wa pay labot ang ilang tagsa-tagsa ka mga protektor sa local level – nasiplatan sa mga intelligence reports nga adunay koneksyon pananglit diha sa dula sa droga.

Daghan ang malagmit maligsan apan husto ang maong lakang sa pamunuan: Kun atong gitinguha nga paggun-ob sa entero apparatus sa krimen, angay gayud nga ang kausaban kun reporma top-to-bottom.

Apan magpabilin nga dakung hagit ngadto sa pamuno-nasud ang pagbuntog sa mga dagkung nagpaluyo sa droga sama sa mga foreign drug manufacturers, traffickers, financiers, protectors ug uban pang nagkamar ug dakung kwarta gikan sa maong binuhatan.

Kun buot gayud nato pagpukan sa droga, ig-on nato dili lamang ang mga gagmay ug ultimong drug pusher ug couriers diha sa street level apan ig-on nato didto mismo sa kasingkasing sa source kun tinubdan: Ang mga dealers ug manufacturers niini aron mapatuman nato ang gitawag nga market ug supply denial silbing istratehiya kontra droga ug korapsyon.

RadyoMaN June Duterte

Facebook Comments