Suma Total sa Straight to the Point: Tokhang Revived

Davao City – Sa pagpabalik ug pagbanhaw sa ‘war on drugs’ sa kamot sa nasudnong kapulisan, atong panghinauton nga matarong na kini nga matang sa ‘centerpiece program’ sa Duterte administration.

Maanindot ug dalaygon baya ang tumong ug katuyuan sa maong kampanya: Kana mao ang pagpitol sa hingpit sa grabe ka mangtas nga klase sa bisyo ug sinindikatong buhat.

Dili nato ikalimod nga gumikan sa droga, grabeng krimen na ang nahimo sa tawong gigamhan sa demonyong impluwensiya niini: Mga bata, babaye, batan-on ug bisan mga tigulang sak-on sa panimalay, atangan sa kalsada, ilugon ang ilang mga personal nga kagamitan, ug dili pa matagbaw, panamastamasan, patyon ug dabdaban ang ilang walay kalaban-laban ug inosenteng mga biktima.


Binuhatan pa ba kini sa tarong ug pamensar? Or mugna na kini sa yawan-ong nagdikta sa tawong lulong kun na-praning na sa droga?

Tama lang nga atong hikutaron ang mas lig-on ug mas determinado, mas pogosong kampanya aron pagguba sa pundasyon o makinaryas o apparatus sa maong criminal activity.

Hugtan nato ang kampanya sa street level diin anaa ang mga yanong pobreng gihimong courier o peddler o bin baha ‘willing victim or users’ sa maka-addict nga klase sa prohibited substance.

Apan dili nato hikalimtan nga kun walay drug manufacturer, trafficker, druglord o protector, wala untay mokaylap o mokuyanap pa nga shabu diha sa kabarangayan. Husto lang nga dungan sa paggukod niadtong street peddlers, lutoson usab ang mga high-value drug personalities and targets sa tag-as nga ang-ang kun lebel sa atong katilingban.

Husto ang managkaluhang direksyon sa PNP, PDEA ug mga kaalyados niini: Top-to-bottom campaign inubanan sa pagtratar sa mga biktima nga angay salbaron dili pamatyon, sanglit kritikal man usab ang drug treatment and rehabilitation ilawom sa usa ka mas komprehensibo, mas malangkubon, all-inclusive and whole-of-society harm reduction strategy kontra iligal nga droga.

RadyoMaN June Duterte

Facebook Comments