Suma Total sa Straight to the Point: Wake-up Call

13

Davao City – Ang pag-dismiss sa drug trafficking cases kontra sa mga arestadong drug lords nagpahigmata kanato sa pipila ka masakit nga realidad. Kun buot natong palig-onon pa’g maayo ang atong gyera kontra iligal nga droga, dawaton nato ang pipila ka masakit nga kamatuoran: Una, huyang ug haguka gayud ang atong katakos ug kapabilidad sa pamalaud. Tingali mas maayong i-refresh kun bansayon nato pag-otro ang atong mga abogado aron makakalap ug mas lig-on nga ebidensya ug testimonyo kontra sa mga involved sa droga. Ikaduha, bansayon nato pag-usab ang atong kapulisan ilabi na ang atong mga bangiitang imbestigador kay basi’g gikalawang na nang atong kahanas ba haron makapahigayon ta’g lig-on, kuyaw ug kulba gyud nga case build-up aron dili ‘ta kataw-an sa mga sindikato sa atong way ayong pagpreparar kontra sa mga dagkung drug personalities. Ug ikatulo, atong limpyohan ang atong nataran: Basi’g adunay pipila diha nga salin sa nahurot kun kadtong nagpaka-aron ingnon nga servidor sa tawo ug gobyerno pero diay to tawong korap ug mabayran aron lamang isabotahe ang Philippine drug war. Alang nako, insulto ang nahitabo nga naka-aresto ta’g dagkung drug lords gani ang usa ni-angkon na man nga nagdula gyud siya ug dinagku sa shabu apan kansang kaso wala gani makaabot sa korte kay sa lebel pa lamang sa piskaliya, natipi na man. Makauulaw kini ngadto sa mga abogado sa gobyerno ug sa mga imbestigador nga naggunit sa kaso. Angay gayud nilang ipakita nga dinhi sa Pilipinas, walay double standard of justice ug nga ang hustisya denhe dili mapalit o bin ba kaha ang mga awtoridad masubornohan. Kun buot natong bakwi-on pag-usab ang hingpit pagsalig sa ordinaryong tawo, angay nilang ipakita nga kaya natong manikop ug bariles, dugong o balyena, dili kay kutob ra ‘ta sa tulingan o bolinao lamang. Husto usab si Pres. Duterte: Sa higayon nga maka-ipsot gani kining si Kerwin Espinosa, si Vitaliano Aguirre ang angay ipuli sa iyang nahimutangan! RadyoMaN June Duterte tags: dxdc 621 davao

Facebook Comments