Zamboanga del Sur – Miulbo ang sunog sa duha ka mga lungsod sa probinsya sa Zamboanga del Sur kagahapong adlawa.
Unang gilamoy sa kalayo ang usa ka bungalow house nga gipanag-iyahan ni Allan Nercua Aya-ay. Nahitabo ang sunog alas 2:45 sa kadlawon didtong dapita sa Purok Mindahila, Barangay Kapatagan, Vincenzo Sagun, Zamboanga del Sur.
Gibana-banang mokabat sa 1 ka milyon ang natalang damyos sa maong sunog base na usab sa gipahigayong imbestigasyon sa mga mirespondeng kabumberuhan sa Margosatubig BFP. Padayun pa gihapong gisuta sa imbestigador ang hinungdan sa sunog.
Pagka alas 12:45 ang takna sa hapon, naugdaw ang usa ka panimalay nga gipanag-iyahan ni Cha-cha Tumaroy ug ang giabangan sa magtiayon nga sila si Police Corporal ug Mrs. Aquagem Abordo. Nahitabo ang sunog didtong dapita sa Purok Malinawon, Brgy. Paglaum, Lungsod sa Dumalinao ning probinsya sa Zamboanga del Sur.
Mobalor sa kapin kon kulang 70 mil pesos ang kantidad sa natalang inisyal nga damyos.
Sa imbestigasyon nga gipahigayon sa mirespondeng kabumberuhan sa Pagadian nasayran nga nasaksihan mismo sa caretaker nga si Corazon Labatigan ang kalayo nga miulbo sa kusina sa naasoyng panimalay. Si Corazon usab ang magbalantay sa duha ka anak sa magtiayong Abordo. Dali niya gidala ngadto sa gawas ang duha ka bata babaye nga nailang si Cyrus Rossel Abordo ug si Aubrey Alyana Danick Abordo. Wala matud pa ang magtiayon gumikan kay nagduty kini.
Sa interview ngadto sa tag-iya mismo sa maong balay, namahayag siya nga posibleng nag-overload ang linya sa kuryente. Gisaysay pa niya nga nahitabo na usab kanhi nga hapit usab nasunog ang naasoyng panimalay gumikan sa overloading sa kuryente.
Atol sa pagkasunog sa panimalay, nabati usab ang mga buto nga posibleng naggikan sa mga bala nga gipanag-iyahan sa nag-abang nga pulis.
Gideklarang fire control ala 1:20 sa hapon samtang pagka ala 1:25 sa hapon gideklara na usab sa kabumberuhan nga fire out.
Swerteng walay natalang nasamdan o namatay sa maong insidente.
Padayun pa gihapong gi imbestigahan sa BFP Pagadian ang sinugdanan ug hinungdan sa maong kalayo.
