Sunog niulbo sa lungsod sa San Miguel; kapin kon kulang 1 ka milyon damyos

29

San Miguel, Zamboanga del Sur – Mokabat sa kapin kon kulang usa ka milyon ang damyos sa sunog nga miulbo alas 8:05 ang takna sa gabie niadtong lunes sa Purok Imelda, Poblacion, San Miguel, Zamboanga del Sur.
Ang mga nasunog nga stalls gipanag-iyahan nila ni Marcial Replagao, Edilberto Panugan, Erwin Gaas, Eugenio Librea ug Arman Ruben samtang lain pang unom ka balong-balong nga adunay mga baligya ang naabo nga gipanag-iyahan nila ni Merlyn Sugabo, Edrolin Palgan, Mary-ann Imperial, Flordelyn Camanian, Roynick Imperial, ug Junie Rex Sugabo.
Sa imbestigasyon nga gipahigayon sa mga personahe sa Bureau of Fire Protection Margosatubig, Zamboanga del Sur gibutyag nga ang kalayo nagsugod sa usa ka restaurant/stall nga gipanag-iyahan ni Edilberto Panugan ug dali kining mikuyanap sa kasikbit nga mga pwesto.
Ang naasoyng sunog daling girespondehan sa fire trucks nga naggikan sa lungsod sa Lapuyan, Dinas, Guipos, Margosatubig ug Pagadian City Fire station.
8:30 sa gabie dideklara nga fire under control samtang pagka alas 10:10 sa gabie gideklara na kini nga fire out.
Sa pagkakaron, padayun pang gisuta sa mga personahe sa BFP ang hinungdan sa naasoyng sunog.

Facebook Comments