Davao City – Kasong robbery with homicide ang atubangon sa suspek nga si Edelmiro PudPud Agua alyas Taroroy sa pagpatay sa iyang landlady nga si Martina Gamus Tancontian, 68-anyos sulod sa balay niini sa Brgy. Coronon, Sta. Cruz, Davao Del Sur.
Matud ni Sta Cruz PNP acting station commander PSI Mary Grace Martinez nga lima ka adlaw ang ilang hotpursuit operation ug nasikop nila kining suspek kagahapong adlawa sa ilang lugar sa may Sitio Igaon, Brgy. Mahan-ub, Bagangga, Davao Oriental pinaagi sa usa ka informant.
Segun ni Martinez nga gikonsidera nila kini karong case solved human sa pagkaaresto sa suspek.
Ang maong suspek adunay patong nga P500,000 reward money.
Samtang, giangkon sa suspek nga siya ang nipatay sa biktima gamit ang kutsilyo.
Pasumangil sa suspek nga tungod sa grabeng kapungot hinungdan nga gidunggab hangtod sa napatay sa suspek ang iyahang landlady.
Nangayo kini og pasaylo ngadto sa mga pamilya sa biktima sa iyang gihimo ug andam siyang atubangon ang kaso batok kaniya.
RadyoMaN Aimee Guinita
