Suspek nga nagbuno patay sa lalaki nga nagtuyo maghimulos sa iya nagdepensa nga self defense lang ang iya ginhimo

18

MOISES PADILLA – Nagdepensa ang suspek sa pagbuno-patay sa lalaki nga nagtuyo nga maghimulos sa iya nga self defense lamang ang iya ginhimo.

Nahibaluan nga priso karun ang suspek nga si Marlyn Bargayo, 49-anyos, matapos nga ginbuno niya ang biktima nga si Rene Lusaran, 48, tinalikdan nga Enero 26 sang gab-i sa Sitio Loblob, Brgy. Magallon Cadre, Moises Padilla.


Sa exclusive interview sang DYHB sa suspek, gintuad sini nga madugay na nga naghambal sa iya si Lusaran nga naluyag ini sa iya, apang wala niya ginasapak bangod may pamilya na siya kag wala man siya naluyag diri. Magkaupod sila sang una nga naga-obra sa isa ka resort.

Suno pa kay Bargayo, masami man siya nga ginagamo ni Lusaran kon ini ang makainom. Tubtob nga sang Enero 26 sang gab-i, ginbato ni Lusaran ang ila balay, kag iya ini ginguwaan sa diin may dala na siya nga patalom bangod wala siya sang upod sa ila balay.

Sang nakaguwa na siya, nakita niya si Lusaran nga hubog kag ginatuyo siya hakson sa diin ginhambalan pa siya sini nga luguson kag patyon. Nag-ayo pa si Bargayo nga buy-an siya ni Lusaran, apang wala ini nagpati gani iya ini ginbuno.

Suno sa suspek, self defense lamang ang iya ginhimo bangod wala man siya sang tuyo nga patyon ang biktima. Wala sang upod sa balay si Bargayo sang natabo ang krimen bangod ang iya tatlo ka kabataan, didto nagatiner sa iya bana sa Brgy. Guinpanaan.




Samtang si Lusaran ang may siyam ka mga kabataan kag ang iya live in partner sa Manila nagatiner. Ang live in partner ni Lusaran, pakaisa naman sang bana ni Bargayo.

[image: image.png]
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>

Facebook Comments