Suspek nga nagpatay kay Mayor Mondia sang Pulupandan, patay man matapos nagbato sa pulis

DINGLE, ILOILO – Patay ang isa sa mga principal suspect sa pag-ambush kag pagpatay sa anay alkalde sang Pulupandan nga si Mayor Luis Mondia, Jr. matapos ini nagbato sa mga utoridad sang gin-serbe ang warrant of arrest batuk sa iya kaina sang kaagahon sa banwa sang Dingle, Iloilo.

Nakilala ang suspek nga si Rammy Enojo, ginakabig Top 6 Most Wanted Person, Provincial Level kag isa sa nagapanguna nga suspek sa pagpatay kay Mondia sadtong February 17, 2010 sa gwa sang isa ka simbahan sa distrito sang Jaro, Iloilo City.

Ang operation ginpatigayon sang joint elements sang Provincial Special Operations Group (PSOG), Iloilo Provincial Police Office (IPPO) kag sang Dingle Municipal Police Station may mga las 5:30 kaina sang kaagahon sa Brgy. Tambun-ak, Dingle, Iloilo.


Suno sa police nga ila gin-serbe ang warrant of arrest batuk kay Enojo sa kaso nga murder nga ginfile batuk sa iya, may petsa nga September 12, 2012 kag wala sang bailbond nga gin-recommend.m

Apang ini siya ang nagbato gani napilitan ang mga arresting officer nga ini ang tiruhon.

Nahibaluan nga si Enojo ang gina-angut man sa pila ka mga nagkalatabo nga guns for hire activities subong man robbery incidents upod sa Magno/Matillano Crime gang.

Lakip sa na-recover halin sa suspek amo ang isa ka hand grenade, isa ka calibre .38 nga revolver kag isa ka 12 gauge shotgun./DYHB BACOLOD

| Photo of IPPO

Facebook Comments