Suspek nga nagpatay sa 16 anyos nga dalagita sa Cabatuan, ginpasakaan na sang kaso

CABATUAN, Iloilo – Napasaka na ang kaso nga murder kag robbery batok kay Gringgo Morales alias Niko, ang suspek nga brutal nga nagpatay sa 16 anyos nga dalagita sa Zacarias Subdivision, Serrano Extension, Cabatuan, Iloilo sang Pebrero 14.

Ini ang ginkumpirmar ni PSI Sullen Domingo, hepe sang Cabatuan Municipal Police Station.

Kalakip sa ginpasakaan sang kaso ang asawa ni Morales kag ang iya amay nga si Peter Morales.


Suno kay Domingo, kaso nga obstruction of justice ang ginpasaka sa asawa kag amay sang suspek bangod sa pagbutig kag paghatag sang patalang nga impormasyon.

Dugang pa ni Domingo nga sang una pa lang, nakatalupangod na sila nga may inconsistency sa mga statement sang asawa kag sang tatay.

Sang una nila ginpalapitan ang amay, ginpahayag sini nga wala siya makahibalo kon anu ang nahimo sang anak kag kon sa diin ini apang nag-guwa sang ulihi nga nakipagkita na ang suspek sa iya amay kag ginpapalagyo nila ini sa barangay Kahigon sa banwa sang Calinog.

Sa bahin naman sang asawa, ginpahayag ni Domingo nga sang gab-i pa lang matapos nga nakomiter sang suspek ang krimen, nakahibalo na ang asawa sang natabo bangod naglisensya pa sa iya ang bana sa pagpalagyo kag nagpanghimos sang iya kagamitan.

Facebook Comments