Suspek nga nagtiro-patay kay Flores sa Brgy. Vista Alegre natumod na sang pulis

22

Nakilal-an na ang suspetsado nga nagluthang-patay kay Sonny Flores Jr. alyas Negro, 35-anyos sa Abada Escay, Brgy. Vista Alegre, ciudad sang Bacolod, Abril 1,2020.

Ginkumpirmar sang commander sang Police Station 7 nga si Police Lt. Florentino Abalayan, nga may ngalan na sila sang suspek apang indi pa nila mapalayag bangud nagapadayon pa ang hot pursuit operation.


Iligal nga druga ang ginalantaw nga motibo sa krimen bangud sang nagluntad nga komosyon sa transaksyon sang iligal nga druga.

Naguwa sa imbestigasyon nga isa ka anay drug surrender ang biktima kag yara man sa watchlist.

Suno kay Abalayan, may naguwa na nga mga testigo sa krimen kag natumod nga isa man lang ka lugar ang gina-istaran sang suspek kag biktima sa Arao Relocation, Abada Escay, Vista Alegre.

Gindugang pa sang hepe nga drug personality ang suspek nga may yara sang pending minor cases.

Indi pa man matumod ni Abalayan kun magka-upod ukon kontrahanay ang grupo sang duha.




Tatlo ka lupok ang nabatian sang mga testigo kag nakuha sa crime scene ang 2 ka empty shell cal. 45.

Madumduman nga nagapungko lang sa traysikol si Flores sang ini ang ginluthang sang suspetsado, Abril 1.

Kun indi madakpan sa hot pursuit operation ang suspek, kumbinsihon sang Station 7 ang pamilya sang biktima nga magpasaka sang kaso nga murder.

[image: image.png]

Facebook Comments