Maigo, Lanao del Norte – Nagpa-alim pa karon sa pribado nga ospital sa syudad sa Iligan si Former Dumingag Mayor Nacianceno “Jun” Pacalioga, human gipusil didto sa Brgy. Esperanza, Bacolod, Lanao del Norte alas 8:20 kaganihang buntag.
Sa interview sa RMN DXPR Pagadian kang PSI Arnold Toletino ang hepe sa Dumingag Municipal Police Station, nikanaog sa iyang sakyanan ang biktima nga si Jun Pacalioga aron mangihi dihang kalit lang mbutho ang mga suspetsado nga riding in tandem og ang walay langan nga nipusil sa biktima sa makadaghan nga higayon.
Hinoon, anaa na sa luwas nga kahimtang ang kanhi Mayor nga padayon pang gitambalan, dihang nakaangkon og samad pinusilan sa iyang siko ug sampot.
Dali kining gidala sa balay tambalanan sa lungsod sa Bacolod, LDN, apan gibalhin kini sa ospital didto sa dakbayan sa Iligan nga bantay sirado sa kapulisan.
Nasayran sa RMN Newsteam nga gigamit sa mga suspek sa pagpusil kang Pacalioga ang calibre 45 nga pistola.
Sa gilusad nga hot pursuit operation ang tropa sa Bacolod ug Maigo PNP dunay nadakpan nga suspetsado apan padayon ang beripikasyon sa otoridad.
