SUSPEK SA PAGBUNGGO SA MAG-ASAWA NGA MANUNUDLO, GINPADAL-AN NA SANG SHOW CAUSE ORDER SANG LTO.

Ginserbe na kahapon sang Land Transportation Office ukon LTO-6 ang show cause order kay June Paul Valencia, suspek sa pagbunggo-patay sa mag-asawa nga manunudlo sa Diversion Road sang nakaligad nga Sabado.
Suno kay LTO-6 spokesperson Riza Otayde, nabaton sang suspek ang show cause order alas 12:30 kahapon sang udto, apang wala ini nagpakita sa mga katapo sang LTO.

Suno kay Otayde nga nasaad sa show cause order nga dapat magpakita sa LTO si Valencia sa sulod sang lima ka adlaw matapos mabaton ini agud magpaathag sang iya bahin.

Dugang pa ni Otayde nga epektibo naman ang 3 ka bulan nga suspension sang lisensya ni Valencia pagkabaton sini sang show cause order kon sa diin indi ini mahimo magdrive sang salakyan.
Samtang yara na sa Operations Division sang LTO ang lisensya ni Valencia nga posible pagakanselahon pananglitan mapamatud-an nga guilty ini sa reckless driving.


Facebook Comments