General Santos City—Sikop sa operatiba sa Police Station 2 ang usa ka Jojo Manaloto, legal age, ug usa ka 12 anyos nga minor de edad, pulos residenti sa La Consolacion, Barangay Apopong, Gensan kansa suspek sa pagpangawat sa balay sa Pulis nga si Spo2 Lemuel Laluna, nga nakabase sa Police Station 2.
Nasikop ang mga nasangpit didto mismo sa ilang panimalay human nga nakadawat ug impormasyon ang kapulisan bahin sa kadudahang lihok sa mga nasangpit.
Sumala pa nga ayha nahitabo ang pagkasikop sa duruha, napildi matud pa sa billiard ang 12 anyos nga minor de edad balor ug P5,000.00 butang nga gikatingad-an sa ilang mga silingan. Tungod nabaniog na sa ilang lugar nga gikawatan ang balay sa pulis ug kwarta balor ug kapin P100,000.00 nagduda ang mga silingan maong gisumbong sa kapulisan.
Didto na gisikop ang minor de edad ug gidala sa kwerpo sa kapulisan, sa pagpahigayon ug enterogasyon ngadto sa nasangpit iyang gisumbong ang usa ka Jojo Manaloto maoy iyang kaubanan sa pagpangawat.
Nasayran nga ang minor de edad maoy nisulod sa balay samtang si manaloto maoy nagsilbing lookout.
Sa karon balhog na sa silda ang suspek nga si Manaloto samtang gikatakdang iturn-over sa CSWDO-Gensan ang minor de edad.
