Davao City – Gipalawman karon sa Tagum City PNP ang imbestigasyon sa pagpusil-patay sa usa ka mekaniko nahitabo sa Phase 2, Cristorey, Brgy. Magugpo West, Tagum City alas-3:50 sa hapon niadtong Lunes (October 11, 2021).
Sa report sa Tagum PNP, giila ang biktima nga si Raydelle John Roa, 27-anyos, residente sa naasoy nga lugar.
Sa interbyu sa DXDC RMN Davao kang Police Lieutenant Colonel Ruth Dizon, Chief of Police (COP) sa Tagum City Police Station, gisulti niini nga ilaha pang gina-check ang CCTV (closed-circuit television) sa lugar nga dakong tabang sa pag-ila sa suspek.
Nasayran nga nag-ayo og motorsiklo si Roa sa iyang shop sa dihang adunay lalaki nga kalit lamang miduol kaniya ug gipusil kini sa makadaghang higayon, dayon misibat ang suspek gamit ang iyang motorsiklo.
Muabot sa walo ang igo sa biktima ug narekober sa crime scene ang muabot sa 14 ka fired cartridge, 6 ka fired bullets, ug 1 ka deformed fired bullet, diin nagtuo ang Tagum PNP nga basin og aduay nakabikil o nakaaway ang biktima nga miresulta sa krimen.
“Sige pa mi’g conduct og follow up investigation ana. Naga gather pa ‘ta og mga information. Naga-check ‘mi sa CCTV kung makonek-konek namo asa dapit sa palibot para at least, masumpay-sumpay nato (para sa imbestigasyon),” sulti ni Dizon.
Padayon karon ang ginapahigayong hot pursuit operation aron masikop ug mapanubag ang responsable sa insidente.
RadyoMaN Kirby Manzon
