General Santos City–Gikumperma ni Police Captain Boby Maghirang, Deputy Chief Of Police sa Alabel PNP nga misukol gyud ang suspek nga si Miguilito Ranua, legal age, residenti sa Purok 5, Barangay Cogonal, Alabel, Sarangani Province kansa napusilan sa police atol sa gihimong buybust operation sa kapulisan niadtong nakalabayng adlaw.
Nasayran nga napalitan ug usa ka pakete sa gituohang pinaugang dahon sa marijuana ang suspek sa police nga nagpakarong-ingnong poseur buyer gamit ang P500.00 nga marked money.
Dihang dakpon na unta sa kapulisan ang suspek didto na kini nisukol pinaagi matud pa sa paglabay ug Granada sa mga police. Maayo nalang wala mibuto apan siya mapusilan igo sa dughan ug sa ulo nga bahin nga hinungdan sa iyang kamatayon.
Gikaingong dugay na nga anaa sa drug watchlist sa Alabel PNP si Ranua kini subay na usab sa kumpermasyon ni Police captain Maghirang.
