Patay ang 24 anyos nga lalaki human misukol atol sa drug buy bust operation sa Jasaan, Misamis Oriental mga alas 11:45 kagabie.
Matud ni Police Chief Inspector Rogelio Labor, Hepe sa Jasaan Municipal Police Station nga ang suspek mao si Antonio Dulas alyas Bombom ug taga Nahalinan, Jasaan, Misamis Oriental.
Gibutyag ni Chief Inspector Labor nga nibunot sa armas ug unang nagpabuto ang suspek hinungdang nibalos ang kapulisan ug naigo sa ulo si Dulas.
Nakuha gikan sa suspek ang tulo ka sachet sa gituohang shabu ug armas.
Gidugang ni Labor nga naa na sa target list sa Philippine Drug Enforcement Agency ang suspek ug nagtago-tago human nahimong suspek usab sa shooting incident nga nahitabo sa Cabulig River sa Jasaan niadtong Dominggo sa pagkabanhaw.
Ang buy bust operation gihimo sa hiniusang pwersa sa kapulisan sa Jasaan Municipal Police Station ug Misamis Oriental Provincial Drug Enforcement Unit.
